Príslovia

1 ----
1 (HEM) מענה רך ישיב חמה ודבר עצב יעלה אף׃

2 ----
2 (HEM) לשון חכמים תיטיב דעת ופי כסילים יביע אולת׃

3 ----
3 (HEM) בכל מקום עיני יהוה צפות רעים וטובים׃

4 ----
4 (HEM) מרפא לשון עץ חיים וסלף בה שבר ברוח׃

5 ----
5 (HEM) אויל ינאץ מוסר אביו ושמר תוכחת יערם׃

6 ----
6 (HEM) בית צדיק חסן רב ובתבואת רשע נעכרת׃

7 ----
7 (HEM) שפתי חכמים יזרו דעת ולב כסילים לא כן׃

8 ----
8 (HEM) זבח רשעים תועבת יהוה ותפלת ישרים רצונו׃

9 ----
9 (HEM) תועבת יהוה דרך רשע ומרדף צדקה יאהב׃

10 ----
10 (HEM) מוסר רע לעזב ארח שונא תוכחת ימות׃

11 ----
11 (HEM) שאול ואבדון נגד יהוה אף כי לבות בני אדם׃

12 ----
12 (HEM) לא יאהב לץ הוכח לו אל חכמים לא ילך׃

13 ----
13 (HEM) לב שמח ייטב פנים ובעצבת לב רוח נכאה׃

14 ----
14 (HEM) לב נבון יבקש דעת ופני כסילים ירעה אולת׃

15 ----
15 (HEM) כל ימי עני רעים וטוב לב משתה תמיד׃

16 ----
16 (HEM) טוב מעט ביראת יהוה מאוצר רב ומהומה בו׃

17 ----
17 (HEM) טוב ארחת ירק ואהבה שם משור אבוס ושנאה בו׃

18 ----
18 (HEM) איש חמה יגרה מדון וארך אפים ישקיט ריב׃

19 ----
19 (HEM) דרך עצל כמשכת חדק וארח ישרים סללה׃

20 ----
20 (HEM) בן חכם ישמח אב וכסיל אדם בוזה אמו׃

21 ----
21 (HEM) אולת שמחה לחסר לב ואיש תבונה יישר לכת׃

22 ----
22 (HEM) הפר מחשבות באין סוד וברב יועצים תקום׃

23 ----
23 (HEM) שמחה לאיש במענה פיו ודבר בעתו מה טוב׃

24 ----
24 (HEM) ארח חיים למעלה למשכיל למען סור משאול מטה׃

25 ----
25 (HEM) בית גאים יסח יהוה ויצב גבול אלמנה׃

26 ----
26 (HEM) תועבת יהוה מחשבות רע וטהרים אמרי נעם׃

27 ----
27 (HEM) עכר ביתו בוצע בצע ושונא מתנת יחיה׃

28 ----
28 (HEM) לב צדיק יהגה לענות ופי רשעים יביע רעות׃

29 ----
29 (HEM) רחוק יהוה מרשעים ותפלת צדיקים ישמע׃

30 ----
30 (HEM) מאור עינים ישמח לב שמועה טובה תדשן עצם׃

31 ----
31 (HEM) אזן שמעת תוכחת חיים בקרב חכמים תלין׃

32 ----
32 (HEM) פורע מוסר מואס נפשו ושומע תוכחת קונה לב׃

33 ----
33 (HEM) יראת יהוה מוסר חכמה ולפני כבוד ענוה׃