Žalmy

1 ----
1 (HEM) ברכי נפשי את יהוה יהוה אלהי גדלת מאד הוד והדר לבשת׃

2 ----
2 (HEM) עטה אור כשלמה נוטה שמים כיריעה׃

3 ----
3 (HEM) המקרה במים עליותיו השם עבים רכובו המהלך על כנפי רוח׃

4 ----
4 (HEM) עשה מלאכיו רוחות משרתיו אש להט׃

5 ----
5 (HEM) יסד ארץ על מכוניה בל תמוט עולם ועד׃

6 ----
6 (HEM) תהום כלבוש כסיתו על הרים יעמדו מים׃

7 ----
7 (HEM) מן גערתך ינוסון מן קול רעמך יחפזון׃

8 ----
8 (HEM) יעלו הרים ירדו בקעות אל מקום זה יסדת להם׃

9 ----
9 (HEM) גבול שמת בל יעברון בל ישובון לכסות הארץ׃

10 ----
10 (HEM) המשלח מעינים בנחלים בין הרים יהלכון׃

11 ----
11 (HEM) ישקו כל חיתו שדי ישברו פראים צמאם׃

12 ----
12 (HEM) עליהם עוף השמים ישכון מבין עפאים יתנו קול׃

13 ----
13 (HEM) משקה הרים מעליותיו מפרי מעשיך תשבע הארץ׃

14 ----
14 (HEM) מצמיח חציר לבהמה ועשב לעבדת האדם להוציא לחם מן הארץ׃

15 ----
15 (HEM) ויין ישמח לבב אנוש להצהיל פנים משמן ולחם לבב אנוש יסעד׃

16 ----
16 (HEM) ישבעו עצי יהוה ארזי לבנון אשר נטע׃

17 ----
17 (HEM) אשר שם צפרים יקננו חסידה ברושים ביתה׃

18 ----
18 (HEM) הרים הגבהים ליעלים סלעים מחסה לשפנים׃

19 ----
19 (HEM) עשה ירח למועדים שמש ידע מבואו׃

20 ----
20 (HEM) תשת חשך ויהי לילה בו תרמש כל חיתו יער׃

21 ----
21 (HEM) הכפירים שאגים לטרף ולבקש מאל אכלם׃

22 ----
22 (HEM) תזרח השמש יאספון ואל מעונתם ירבצון׃

23 ----
23 (HEM) יצא אדם לפעלו ולעבדתו עדי ערב׃

24 ----
24 (HEM) מה רבו מעשיך יהוה כלם בחכמה עשית מלאה הארץ קנינך׃

25 ----
25 (HEM) זה הים גדול ורחב ידים שם רמש ואין מספר חיות קטנות עם גדלות׃

26 ----
26 (HEM) שם אניות יהלכון לויתן זה יצרת לשחק בו׃

27 ----
27 (HEM) כלם אליך ישברון לתת אכלם בעתו׃

28 ----
28 (HEM) תתן להם ילקטון תפתח ידך ישבעון טוב׃

29 ----
29 (HEM) תסתיר פניך יבהלון תסף רוחם יגועון ואל עפרם ישובון׃

30 ----
30 (HEM) תשלח רוחך יבראון ותחדש פני אדמה׃

31 ----
31 (HEM) יהי כבוד יהוה לעולם ישמח יהוה במעשיו׃

32 ----
32 (HEM) המביט לארץ ותרעד יגע בהרים ויעשנו׃

33 ----
33 (HEM) אשירה ליהוה בחיי אזמרה לאלהי בעודי׃

34 ----
34 (HEM) יערב עליו שיחי אנכי אשמח ביהוה׃

35 ----
35 (HEM) יתמו חטאים מן הארץ ורשעים עוד אינם ברכי נפשי את יהוה הללו יה׃