Hľadaný výraz: Job 23, Preklad: Hebrejský - Moderný, Počet výsledkov: 1
| 1 ויען איוב ויאמר׃ 2 גם היום מרי שחי ידי כבדה על אנחתי׃ 3 מי יתן ידעתי ואמצאהו אבוא עד תכונתו׃ 4 אערכה לפניו משפט ופי אמלא תוכחות׃ 5 אדעה מלים יענני ואבינה מה יאמר לי׃ 6 הברב כח יריב עמדי לא אך הוא ישם בי׃ 7 שם ישר נוכח עמו ואפלטה לנצח משפטי׃ 8 הן קדם אהלך ואיננו ואחור ולא אבין לו׃ 9 שמאול בעשתו ולא אחז יעטף ימין ולא אראה׃ 10 כי ידע דרך עמדי בחנני כזהב אצא׃ 11 באשרו אחזה רגלי דרכו שמרתי ולא אט׃ 12 מצות שפתיו ולא אמיש מחקי צפנתי אמרי פיו׃ 13 והוא באחד ומי ישיבנו ונפשו אותה ויעש׃ 14 כי ישלים חקי וכהנה רבות עמו׃ 15 על כן מפניו אבהל אתבונן ואפחד ממנו׃ 16 ואל הרך לבי ושדי הבהילני׃ 17 כי לא נצמתי מפני חשך ומפני כסה אפל׃ |
